Andam na ang kapolisan sa Central Visayas Region sa paghatag ug seguridad sa pagsaulog sa adlaw sa mga santos ug kalag sunod buwan .
Moabot ngadto sa kapin 1,200 ka mga personnel ang ideploy sa Police Regional office -7 sa mga sementeryo sa tibook rehiyon aron mohatag ug igong seguridad sa Nobyembre 1 ug 2 subay sa ipatuman nga “Oplan Kalag-kalag.”
Ang Information Officer sa PRO-7 nga si Supt. Reyman Tolentin nibutyag nga gawas sa polis adunay ubang mga volunteers gikan sa Bantay Bayan , BPATS, ug grupo sa lain-laing mga organisasyon ang moabag sa pagbantay sa mga sementeryo sud sa duha ka adlaw nga pag-obserbar sa kalag-kalag .
Nimando usab ang PRO-7 ngadto sa tanang city ug provincial police office nga magbutang ug igong gidaghanon sa Police Assistance Desk sa mga sam-ang ubos sa ilang hurisdiksiyon .
Hugot usab nga ipatuman ang mga lokal nga ordinansa labot sa gidili nga mga butang sulod sa sementeryo ilabi na ang ilimnong makahubog , hait nga hinagiban, sound system ug uban pa.
