TACLOBAN CITY – Magtitake-oath na unta yana nga adlaw an usa nga PNP Applicant ha Police Regional Office 8 han madisgrasya an ira ginsasakyan nga single nga motor ha Provincial Highway Brgy. Campetic, Palo, Leyte., kanina han alas 5:00 han aga.
Basi ha report han Leyte Police Provincial Office, ginkilala an PNP Applicant nga hi Chanver Gonzales Ruiz, backrider, aada na ha sakto nga pangidaron; ginkilala gihap an nagdadrive han motor nga iya bugto nga hi Ronaldo Gonzales Ruiz, aada na ha sakto nga pangidaron ngan pareho nga residente ha San Vicente, Dulag, Leyte.
Ginkilala naman liwat an driver han Isuzu Sportivo nga hi Danilo Laas Laruya, 59 anyos, retired PNP ngan residente ha Brgy. Karunungan, Jiabong Samar.
Subay han inisyal nga imbistigasyon han Palo PNP, gibabaybay han Isuzu nga sarakyan an kakalsadahan tikang ha St. Pauls Schools Of Professional Studies tipakadto ha Police Regional Office 8. Samtang, ginbabaybay naman han single nga motor an kakalsadahan tikang ha Maharlika Higway tipakadto gihap ha Police Regional Office 8.
Naghing-abot an duduha nga sarakyan ha intersection pero tungod han kalaksi han padalagan han single nga motor, nabunggo hini an isuzu nga sarakyan rason han pagsimplang han duduha nga biktima upod an PNP Applicant.
Basi han source han RMN Tacloban, grabe an kabutangan yana han magbugto.
Sumala kan PNP Region 8 Information Officer PSupt. Ma. Bella Rentuaya, kikitaon ngan pag-uuruistoyahan han panel kun pwede pa ba makagtake-oath an PNP Applicant ngan kun ‘fit’ hiya ipailarom ha training kumo pulis.
