Gipasalig karon ni bag-ong Philippine National Police (PNP) spokesperson Chief Supt. John Bulalacao nga dili ug dili gayud i-tolerate sa liderato sa nasudnong kapulisan ang pagdagmal sa duha ka mga pulis-Davao ngadto sa tulo ka mga menor de edad kinsa nadakpan sa curfew regulation.
Sa interview sa media, gitataw ni Bulalacao nga niabot na sa pandungog ni Chief PNP Roland ‘Bato’ Dela Rosa ang maong insidente ug gipasalig nga ang maong dautang binuhatan sa mga salawayong personahe niini wala gi-sanction ug dili duphan sa PNP.
Dugang ni Bulalacao nga ang balaud nagtagana lamang sa ‘temporary confinement’ sa mga gi-kustodiyang batan-on kun ‘Children in Conflict with the Law’ diha sa usa sa mga kwarto sa police station ug ang pag-turnover kanila ngadto sa ilang ginikanan.
Ang maong insidenteng nahitabo sa Barangay Hall sa Barangay 19-B Poblacion District, ning syudad nahimong viral karon ilabi na taliwala sa aktibong pag-vigilar karon sa katawhan sa mga binuhatan sa atong mga kapulisan.
Una niini, mismong si Davao City Mayor Sara Duterte-Carpio nanawagan nga imbestigahan ug maayo ang insidente aron dili kini pamarisan sa uban pang mga men in uniform.
Usab ang Davao City Police Office (DCPO) nag-issue karon sa usaka Official Statement diin nangayo kini ug dispensa sa tanan sa nahitabo uban ang pasalig nga manubag gayud ang hingtungdang mga police personnel.
Pikas bahin, gikabalaka sa pipila ka mga katawhan ang maong panghitabo sanglit daw naghatag lamang kini ug ‘black eye’ ug dautang imahe sa syudad nga gipasidunggan na sa makadaghang higayon nga ‘Most Child-Friendly City – Highly Urbanized Category’ ug ang local government unit nga gipasigarbo kaniadto pa ni Pres. Rodrigo Duterte nga maoy iyang ‘Exhibit A’ kun modelo sa matang sa maayong pagdumala kun good governance.
RadyoMaN June Duterte
