Davao City – Adunay responsibilidad ang ginikanan sa insidenting pagkalumos-patay sa 6-anyos nga babae sa sapa sa Barangay New Visayas, Sto.Tomas, Davao del Norte niadtong Lunes (Oktubre 5, 2020) ug na-rekober ang patay’ng lawas kagahapong adlawa (Oktubre 6, 2020).
Sa interbyu sa DXDC RMN Davao kang Police Major Frederick Deles, Chief of Police (COP) Sto. Tomas Municipal Police Station, gibutyag niini nga kung adunay pormal nga mo-reklamo sa ginikanan, posibleng manubag ang nahisgutan sa pagpasagad nga miresulta sa pagkamatay sa bata.
“Sa ginikanan man gud ‘ni nga (responsibilidad). Kay kung naa gyoy mag reklamo nga wala gyud sila gitagad, gipasagdan lang (sila).. six years old pa man gud ang bata,” segun ni Deles.
Saysay ni Deles, naligo ang biktima sa sapa duol sa dam kuyog ang ig-agaw ug silingan niini nga 9-anyos sa dihang nadalin-as ang biktima ug gi-anod kini sa sulog nga tubig ug pakyas nga naluwas sa iyang mga kauban.
Nagpahimangno ang pulis sa mga ginikanan nga kanunay’ng i-monitor ang ilang mga anak aron malikayan ang susamang insidente.
“So look out sa mga parents gyud. Ilaha gyong bantayan og maayo ang ilang mga anak nga dili maglakaw-lakaw bisa’g asa para malikayan pud ‘ning ing-ani nga mga insidente,” segun ni Deles.
Nasayran nga aduna nay mga nalumos ug namatay nga mga indibidwal sa maong sapa niadtong unang panahon matud sa police official.
RadyoMaN Kirby Manzon
