Davao City – Gilaraw karon sa Philippine National Police Regional Office (PRO-XI) nga makig-alayon sa Bureau of Jail Management and Penology (BJMP-XI) aron sutaon ang mibuto nga impormasyon nga alegasyong gikan mismo sulod sa Davao City Jail ang supply sa iligal nga droga nga gipakatag karon denhe sa syudad sa Davao.
Matud ni PRO-XI spokesperson Maj. Eudisan Gultiano, wala silay nadawat nga impormasyon nga source ang Davao City Jail sa iligal nga droga nga narekober sa posesyon sa duruha ka mga dinakpan apan bisan pa man niini, makig-koordinar gihapon sila sa BJMP-XI aron masuta kun may lig-on ba nga kamatuoran ang seryosong alegasyon.
Ang hukom sa buhatang rehiyonal sa kapulisan nakab-ot niini human nga giyagyag sa mga dinakpan nga sila Ruel Andoy, Jr. ug Ernesto Mazo nga gikan mismo sulod sa Davao City Jail ang P2.5M shabu nga nakumpiska atol sa buy-bust operation nga gilusad sa Criminal Investigation and Detection Group (CIDG-Davao City niadtong January 8, 2020.
Una niini, gibutyag ni BJMP-XI spokesperson Jail Inspector Edo Lobenia nga walay drogang naggikan sulod sa Davao City Jail, gani gidasig niini ang PNP ug PDEA-XI nga i-validate og tarong ang impormasyon nga giluwatan sa duha ka mgha arestado sa katahap nga linglahon niini ang mga awtoridad.
Hinoon, daku ang pagtoo ni Lobenia nga ang mga Persons Deprived of Liberty (PDL) maoy nag-operate sa droga pinaagi sa cellphone communication aron dili ma-diskitahan ang pagsulod-gawas sa mga kontrabando gikan mismo sa prisohan.
Kung ugaling mapamatud-an sa pagahimoon nga imbestigasyon nga nakig-konsabo diay ang pipila ka mga ginsakpan sa BJMP ngadto sa mga arrested drug personalities sa pagpalusot sa illegal drugs, dili magduha-duha ang kapulisan sa pagduso og kasong kriminal ug administratibo batok sa mga jail guards ug mga opisyales niini.
RadyoMan Joel Viray
