Nakahanda ang Philippine National Police na magbigay ng libreng sakay sa mga commuters kasunod nang ikakasang malawakang tigil-pasada ng iba’t ibang transport group.
Ayon kay PNP Spokesperson Police Col. Jean Fajardo, palaging nag-aalok ang Pambansang Pulisya ng libre sakay sa twing may ganitong transport strike upang umagapay sa mga mananakay.
Ipinag-utos na rin aniya ni PNP Chief Police General Rodolfo Azurin Jr., na i-standby ang lahat ng mobility assets ng PNP para maasistehan ang mga commuters na walang masasakyan.
Ani Fajardo, nakipag-coordinate na rin ang PNP sa iba’t ibang lokal na pamahalaan para sa libreng sakay sa kani-kanilang nasasakupan.
Base sa plano ng transport sector, isang linggo ang ikakasa nilang tigil-pasada simula sa Lunes, Marso a-sais kung saan mariin nilang tinututulan ang naka ambang pag phaseout ng mga traditional jeepneys.
