TACLOBAN CITY – Diri dapat mabaraka an mga residente ha Sinirangan Bisayas matapos mapusil-patay han mga otoridad an gin-aaligar terorista ha Ormoc City, Leyte dida han huwebes.
An Philippine National Police (PNP) ngan iba pa nga law enforcement agencies ha rehiyon in nagdudumara hin intelligence ngan monitoring operations para mapugngan an pagsakob han mga gin-aaligar terorista.
“There’s nothing to worry about, we’re doing our best together with other law enforcement agencies. Let’s be vigilant on people na gumagawa ng illegal acts, ipagbigay alam nila, anything that is illegal.”- PNP RD PCSupt. Dionardo Carlos
Dugang ha pamahayag ni Carlos, mas ginbabantayan yana nira an southern part han rehiyon upod na dinhi an Ormoc City kun diin posible nga entry points han mga gin-aaligar terorista tungod nga abri ini ha Mindanao ngan ha Cebu.
Mababaruan nga nagdumara hin operasyon an Philippine Army 802nd Brigade ngan PNP-Criminal Investigation and Detection Group kun diin napatay hi Joseph Anulga, alias dawud nga gintutuuhan nga terorista.
Umato daw hi Anulga durante han gun buy bust operation. Nagbubuhay gihapon hi Anulga hin gun-running activities ngan narerecruit hin mga residente ha Ormoc nga magin Islam.
Sumala han militar, hi Anulga in may koneksyon kan Yusof Macuto, an main suspect ha foiled bombing ha U.S Embassy dida han Nov. 2016 ngan Hilongos, Leyte bombing dida han December 2016.
