Gipaklaro karon sa liderato sa Philippine National Police (PNP) ang mga detalye sa Supplemental Guidelines alang sa pagbanhaw sa ‘Tokhang’ operations nga sugdan na karong sunod semana.
Gitino ni PNP Spokesperson Police Chief Supt. Dionardo Carlos nga lakip sa bag-ong talamdan mao nga sundon sa mga operatiba sa tanang panahon ang rekwisitos sa ‘human rights’ ug ‘rule of law,’ kadtong mga balay nga ipailawom sa operasyon kadto lamang ‘pre-identified’ diha sa listahan sa mga awtoridad, ‘operations must be officer-led,’ mga ‘Tokhangers’ nga naka-uniform lamang ang mopahigayon niini, buhaton lamang sa adlawan kun alas-8:00 sa kabuntagon kutob sa alas-5:00 lamang sa kahaponon Lunes ngadto sa Biernes ug walay ‘Tokhang’ sa kagabhi-on ug sa weekends.
Dugang ni Carlos nga ang ‘Tokhang’ lahi ra sa uban pang mga operations sa kapulisan sama sa mga buy-bust operations, pag-serve sa mga warrants of arrest ug uban pang anti-narcotics drive.
Matud ni Carlos, ang doktrina kun pilosopiya sa ‘Tokhang’ nga kini usaka matang sa ‘bloodless operation’ apan ang paggamit sa armas sa mga awtoridad tungod ug alang lamang sa proteksyon sa katawhan ug sa mga tinugyanan sa balaud.
Una niini, nahimong kontrobersyal ang ‘Tokhang’ gumikan sa mga insidenteng ‘nanlaban’ kun mga suspetsadong gikatahong nanukol samtang gipaubos sa operations lakip na ang nahitabo sa pipila ka mga menor de edad nga napatay sa maong operations kaniadto.
Ang bag-ong guidelines ipailawom na sa ‘casacading’ kun pagpahidangat ngadto sa precint level karong Biernes una pa kini hugot nga banhawon karong Lunes sunod semana, segun sa tigpamaba sa nasudnong kapulisan.
RadyoMaN June Duterte
