Gipaklaro karon sa liderato sa Philippine National Police (PNP) nga walay palisiya ang estado nga pamatyon ang tanang mga drug personalities kutob sa maabtan sa kampanya kontra sa iligal nga droga.
Sa usa ka media interview, gisugilon ni PNP spokesperson Chief Supt. Dionardo Carlos nga walay marching order gikan kang Pres. Rodrigo Duterte o sa PNP higher-ups nga awtomatikong ilikadar gilayon ang mga tawong subject sa law enforcement operations sama niadtong regular nga gilusad nga Oplan Double Barrel Reloaded, Oplan Galugad, Oplan Tokhang, One Time Big Time ug uban pa.
“Wala pong ganung polisiya o ganung pattern…Hindi ho yan ang katotohanan,” matud ni Carlos.
Kahinumdoman nga subling nahimong emosyonal si PNP Director-General Ronald ‘Bato’ Dela Rosa atol sa hearing sa Senado sa dihang gi-akusahan ni Sen. Riza Hontiveros ang nasudnong kapulisan nga responsable sa kamatay sa mga drug suspects.
Ning labing ulahi, nahimong kontrobersyal kaayo ang kamatayon nila ni Grade 11 student nga si Kian Loyd delos Santos ug sa 19 anyos consistent honor student nga si Carl Angelo Arnaiz.
Gipasalig usab karon sa PNP nga wala niini gi-tolerate ang kabuang sa mga salawayong pulis sanglit tipik ug kabahin sa programa sa kapulisan ang internal cleansing versus police scalawags.
Kasamang June Duterte
