Sa pakighinabi sa DXDC RMN Davao kang Police Lieutenant Colonel Jeffrey Latayada, Officer In-Charge, Tagum City Police Station, iyang gisulti nga usa sa posibleng rason sa sunod-sunod nga krimen mao ang kalisod sa panahon.
Bag-ohay lamang sa dihang milyones nga kantidad ang natangag sa mga robbery suspect sa usa ka mall sa Tagum samtang aduna usay tulis nga nahitabo sa terminal sa dakbayan.
“Unsa nga hinungdan (sa krimen) kining kapit-os sa panginabuhi, ilabi na mahal na ang mga palaliton. Ang uban survival kay dili man gyud malikayan ang mga insidente, naa nay mangawat, kay walay kaonon kung dili sila kakawat. So, naa gyoy uban organized na nga nahimo na gyud nilang livelihood na,” sulti ni Latayada.
Alayon niini, dugang personahe ang gi-request sa Tagum City Police, gawas pa sa ilang koordinasyon sa Mobile Force ug Force Multipliers nga mutabang sa pagmintinar sa kahapsay ug kalinaw sa Tagum.
Giawhag usab sa police official ang Tagumeños nga gilayong i-report ang iligal nga aktibidad o mga kadudahang indibidwal sa ilang palibot.
RadyoMaN Kirby Manzon
