Dida han Dominggo, alas 4:30 han kulop, ginpamumusil patay an usa nga security guard han Palawan Pawnshop Real branch Brgy. 47, Real St. Syudad han Tacloban. Usa nga diri pa makilal-an nga suspek an nagpapaluyo hini.
Ginkilala an biktima nga hi Agustin Ranalan, aada na ha sakto nga pangidaron, residente ha Brgy. Cavite West ha Palo, Leyte.
Base ha kuha han CCTV Camera, makikit-an nga humaw-as an suspek tikang ha iya ginsakyan nga pampasahero nga jeep. Deretso ini nga kumadto ha security guard nga nagbabantay han mao nga Pawnshop. Ginpusil katulo an biktima.
Dida han may pumara nga pampasahero nga multicab, sumakay an suspek nga baga hin waray la may nahinabo.
Nadara pa hi Ranalan ha hospital pero dead on arrival na ini.
Sumala kan PCInsp. Alex Echon, TCPO station 1 commander, ginklaro niya nga waray robbery nga nahinabo o pan hold up kundi shooting incident o tuyo gud pagpatay han suspek ha biktima.
Mayada man ngani kuha ha CCTV camera, problema yana han mga otoridad kay diri makilal-an an suspek kay may sul-ot ini nga kalo ngan facemask.
Damo iton mga anggulo nga kinahanglan alinsusunuron han mga otoridad hini nga krimen sugad nala han tigda nga pagpara han multicab rason nga nakasakay dayon an suspek pahirayo ha crime scene.
