Davao City – Gipasalig karon sa liderato sa nasudnong kapulisan nga ipursigi nila ang motu propio investigation sa dugoong insidenteng police raid sa Ozamiz City diin 15 ka mga tawo lakip mismo ang alkalde sa syudad Reynaldo ‘Aldong’ Parojinog napatay.
Sa iyang giluwatang pamahayag sa programang Straight to the Point, giklaro ni PNP spokesperson Sr. Supt. Dionardo Carlos nga gipailawom na sa halapad nga internal investigation sa PNP Internal Affairs Service ang insidente aron pagsuta kun aduna bay nalapas nga mga lagda kun reglamento diha sa pagpatuman sa nahimong kontrobersyal nga police operations.
Gitataw usab ni Carlos nga kun man ugaling adunay gigunitan karon nga mga kasayuran o bin ba kaha testigo ang pamilyang Parojinog sa nahitabo sa Ozamiz, didto kini nila angay ipabuhagay sa hawanan sa hukmanan ug andam kining atubangon sa ahensya sa kapulisan sa nasud.
Unang gikataho nga adunay usa ka alleged survivor sa naasoyng raid kinsa nag-alegar nga ang mayor ug pipila ka mga kakaubanan gipamusil pointblank ug gilabayan ug granada hinungdan sa ilang kamatayon.
Pikas bahin, gikumpirma ni Dante Jimenez, convenor sa grupong Volunteers Against Crime and Corruption (VACC) nga nidangop ug nangayo kanila ug asistinsya ang pamilyang Parojinog. Tinguha sa ilang grupo mao nga masayran usab unsa gayud ang matuod nga nahitabo sa Ozamiz niadtong tungora.
Sa ilang kabahin, gitino ni Philippine Drug Enforcement Agency (PDEA-XI) regional director Adzhar Albani nga denhe sa rehiyon, target usab sa mga narcotics operatives nga gukdon ang mga ‘high-value targets.’
Kahinumdoman nga adunay bag-ong warning si PNP director-general Ronald ‘Bato’ Dela Rosa nga daghan pang mga druglord ug mga ‘narco politicians’ malagmit maoy sunod nga ma-neutralisa kun dili sila mo-ampo nga malinawon sa mga tinugyanan sa balaud.
Kasamang June Duterte
