PALO, LEYTE – Gindumara kakulop an closing ceremony han Tokhang:200 nga programa han Police Regional Office 8 ngan pipira nga ahensya han gobyerno nga naghatag hin skills training ngan pakabuhi ha purluminos 151 nga mga drug surrenderees nga tikang pa ha magkadurudilain nga lugar han Sinirangan Bisayas.
Gintagan hin tagsa-tagsa nga kagamitan an mga graduates nga magagamit nira ha ira titikangan nga pakabuhi pinaagi han ira nahibaruan ha ira ginpili nga vocational skills sugad han massage therapy, electronics, food processing ngan damo pa.
An iba naman nga graduates in ginkukuha han LGU’s kun diin hira in magigin rescue volunteers han ira lugar.
Sumala kan Ivan Alexia, 21 anyos, usa ha mga nakagradwar ha Tokhang:200, dako an iya pasalamat tungod han kadako nga bulig han mao nga programa ha iya ngan ha iya pamilya matapos hiya bumaya ha pag gamit hin illegal nga droga.
Sumala kan PCSupt. Gilberto Cruz, Regional Director han Police Regional Office 8, an mga Chief Of Police han kada bungto kun diin naukoy an drug surrenderee an magmomonitor ha ira. Ipapailarom naman gihapon ha random drug testing an mga graduates agud masiguro nga waray na hira bumalik ha pagamit hin illegal nga droga.
Dugang pa han opisyal nga kun bumalik nga paggamit han illegal drugs an mga graduates in dadakpon la gihapon hira han mga kapulisan.
Magkakamayada naman hin ika duha nga batch an Oplan Pagbabago Program han PRO8 kaupod na an 8th Infantry Division Philippine Army kun diin ipapailarom gihapon ha mao nga programa an mga anay NPA.
