Susihon sa kapolisan dinhi sa Central Visayas ang mga personalidad nga gipanganlan sa giisip nga bigtime drug pusher nga nadakpan sa buy-bust operation sud sa usa ka motel dinhi sa dakbayan sa Sugbu.
Ang 23 anyos nga si Walter Oliamot nga taga sitio Gatepass sa Barangay Guadalupe nibutyag nga girecruit siya alang sa maong ilegal nga kalihukan sa iya ra sang silingan nga ginganlan ug Juan Daclan .
Dugang pa ni Oliamot nga si Daclan manawag sa usa ka alyas “Siao” nga giingong naa sa sud sa Cebu City Jail kung adunay mopalit ug dinagku nga suplay ug siya usab ang modeliver niini ngadto sa customer .
Matud sa hepe sa Drug Enforcement Group Central Visayas nga si Supt . Glenn Mayam ilang susihon kung unsa ka tinood ang mga pahayag ni Oliamot ilabi na kay naghingan kini ug usa ka tawo nga anaa sud sa City Jail .
Si Oliamot nakuhaan ug binulto nga shabu sa buy-bust operation nga gibana-banang mobalor ug P4.7 milyon ka pesos .
Tulo ka buwan na siyang gipanid-an sa kapolisan sa iyang operasyon.
