Davao City – Subling gi-awhag karon sa liderato sa Philippine National Police (PNP) ngadto sa mga kritiko sa ‘war on drugs’ nga dili lamang mohunong diha sa pag-akusar nga adunay nahitabong ‘extra-judicial killings’ kun EJKs atol sa pagpatuman sa balaud kontra droga.
Sa pakighinabi kaniya sa programang ‘Straight to the Point,’ gitin-aw ni PNP Spokesperson Chief Supt. Dionaldo Carlos Point’ nga gikinahanglan og igong basehan, dili lamang pulos pasangil sama sa akusasyon nga aduna na usay laing tulo ka mga drug personalities ang gi-likidar sa mga pulis-Tondo sa Manila.
Ang isyu nilutaw sa dihang gipublikar sa Reuters international wire agency nga adunay kalapasang nahimo ang mga tinugyanan sa balaud sa dihang ilang gi-neutralisa ang pipila ka mga drug suspects didto sa kaulohan.
“Yan naman po palagi nilang binabato pero wala naman silang specifics (evidence) sa kanilang paratang,” segun ni Carlos.
Sa pikas bahin, nagpadayon gihapon karon ang ang ‘intensified internal cleansing’ batok sa mga salawayong personahe sa PNP subay sa marching order ni PNP Chief Ronald “Bato” Dela Rosa.
Gani sumala ni Carlos, approved na ang budget alang sa pag-purchase of mga ‘body cameras’ diin required na kini nga gamiton sa mga operatiba samtang gipatuman ang ‘drug war’ aron transparent ang tanang mga police operations.
“Nag-aadjust po tayo doon sa nakikita nating makakatulong ngunit kung ito lamang ay paninira o sirain yung kampanya, ‘wag naman po, at maging positibo tayo,” dason pa usab sa tigpamaba.
Usab gihagit ni Carlos ang katawhan nga dili magpanuko sa paghatag og mga suhestyon alang sa kaayohan sa kampanya ug alang sa kaayuhan sa nasud mismo.
Hangtud karong mga panahona, wala pay opisyal nga direktibang nadawat ang PNP gikan kang Pres. Rodrigo Duterte alang sa subling pag-assign sa PNP nga maoy lead agency sa Philippine drug war for the third time.
RadyoMaN Jason Amisola
