PNP: Truck nga nabanggaan og bus, nagubaan ug nagbutang og warning device

Davao City – Naabtan pa og kapin duha ka oras ang operasyon sa otoridad una nakuha ang naipit driver sa bus nga mibangga sa usa ka trailer truck sa Brgy. Tuganay, Carmen, Davao del Norte niadtong April 13, 2024 sa alas 3:45 sa kaadlawon.

Sa pakighinabi sa DXDC RMN Davao kang PSMS Joconer Coronel, ang traffic investigator sa Carmen Municipal Police Station, iyang giila ang biktima nga mao si Jonathan Mula kinsa patay ng nakuha gikan sa pagkaipit, pasado alas 7 na sa buntag.

Sumala sa imbestigasyon nga nagub-an ang trailer truck hinungdan nga nakulgot kini sa ngitngit nga bahin sa highway.

Butyag sa pulis nga sutaon pa nila karon kung unsa ang mamahimong settlement o aduna bay tulubagon ang bahin sa trailer truck ilabi na nga nagbutang daan matud pa kini og early warning signs.

“Although obstruction siya didto kay naa siya sa fast lane, pero nagbutang man gud siya sa mga early warning device tapos nag-hazard pud siya. So, mangita pata sa unsa dapat buhaton. Ang driver lang gyud sa bus, wala lang gyud siya kabantay kay ngitngit kaayo sa area,” saysay ni Coronel.

Nadala na sa Davao Regional Medical Center ang naipit sab nga konduktor samtang gilayong natabang ang kapin 22 ka mga pasaherong naangol.

RadyoMan Ivy Parido