Subling gitino karon sa liderato sa Philippine National Police (PNP) nga gisugdan na nila paghikutar ang mando aron taktakon sa pwesto ang tulo ka mga heneral sa nasudnong kapulisan gumikan sa mga salimpangkong nga binuhatan.
Sa interview sa media, gibatbat ni PNP Spokesperson Chief Supt. Dionardo Carlos nga wala sila masayud sa status karon ning tulo ka mga de-ranggong opisyal sa nasudnong kapulisan gawas lamang ang pag-ingon nga anaa na sa prerogative sa palasyo sa Malacañang kun kanus-a i-anunsyo ang termination niining trio nga mga ranking police officers.
“These officers have been subjected to due process,” segun sa tigpamaba sa PNP kinsa nagtug-an usab nga adunay poco mas o menos 70 ka mga ‘police scalawags’ kun ‘hoodlums in uniform’ kinsa mataktak usab sa pangatungdanan gumikan sa klase-klaseng kasal-anan sa ilang pagpanerbisyo.
Matud ni Carlos, ang maong mga erring law enforcers gilangkuban sa mga salawayong pulis gikan sa ranggo nga PO1 ngadto sa Police Superintendent kun colonel.
Una niini, gipanganti ni Pres. Rodrigo Duterte nga andam siya ug tagana nga sipa-on ensigida kadtong iyang gitawag nga mga ‘gangster cops’ kun nahilambigit sa nagkadaiyang mga kasal-anan sama sa involvement sa illegal drugs, ‘ninja cops,’ corruption, criminal negligence ug uban pa.
RadyoMaN June Duterte
