Davao City – Adunay madawat nga freebies ang unang 500 nga buntis nga motambong sa ipahigayong ika-15th National Araw ng mga Buntis sa The Atrium, Abreeza Mall-Davao magsugod karong alas 12:00 sa udto ngadto sa alas 5:00 sa hapon.
Sa pakighinabi kang Dr. Gina Alvarez sa programang ‘Serbisyong Straight to the Point’, giklaro niini nga prayoridad sa maong aktibidad ang mga buntis nga pasudlon sa activity area aron masegurong maakomodar kini.
“Maglaag-laag lang sa ang mga kauban sa buntis kay dili man gayud ta masakto didto (activity area),” segun ni Alvarez.
Sa maong aktibidad, adunay ipahigayong lectures sama sa kung unsa ang angayang buhaton nga mga preparasyon sa usa ka mabdos sa panahon nga adunay kalamidad o emerhensiya sa syudad nga nahimutangan ug mga kasinatian sa usa ka buntis sa mga nilabay’ng delubyo sa Davao City sama sa baha ug sunog.
Gani, tumong sa maong aktibidad nga ma-edukar dili lang ang mga mabdos apan ang tanang kababayen-an kun inahan kung unsaon pagsalbar sa ilang kaugalingon panahon sa kalamidad ilabi na kun wala na ang ilang tagsa-tagsa ka pikas.
Gi-awhag ni Dr. Gina Alvarez ang tanang inahan ilabi na ang mga mabdos nga motambong sa ika-15 nga tuig sa maong selebrasyon diin adunay tema nga “POGS: Kaagapay ni Buntis sa Panahon ng Kalamidad at Krisis.”
RadyoMaN Jason Amisola
