Davao City – Pormal nang nakapasaka og reklamo sa NBI XI si Louie Hermosilla, police auxiliary nga gikulata aron paangkunon sa pagtulis ug pagpatay sa usa ka retired seaman sa Brgy. Sasa, Davao City.
Gitumbok sa reklamo nga physical injury ug kalapasan R A 6713 kun Ethical Standards of public officers and employees in the government si Police Captain Nolan Tagsip, ang hepe sa Special Operations Group(SOG) sa lokal nga kagamhanan ug Police Major De Guzman, hepe sa Sasa police precinct.
Makita pa sa dughan sa police auxillary ang agi sa combat shoes ni Police Captain Tagsip human tamak tamaki ang biktima sulod sa opisina ni Major De Guzman sa Sasa Pnp aron paangkunon sa krimen nga pagtulis ug pagpatay.
Gisaysay sa biktima nga plano kuno siyang i-salvage apan wala mahinayon kay niabot ang anak sa seaman nga miabswelto kaniya ug iyang kumpare nga pulis diin maoy nakasalbar sa iyang delikadong kahimtang gikan sa kamot sa mga pulis ubos sa kamanduan sa Davao City Police Office.
Gipaningkamotan sa DXDC RMN Davao nga makuha ang komento sa mga opisyal sa pulis nga giakusahan apan hangtud ning pagsulat wala pay reaksyon ang DCPO sa insidente.
Kahinumduman nga midangop sa DXDC RMN Davao ang pamilya sa biktima aron magpatabang sa ilang gidangatan sa kamot sa kwerpo sa kapulisan.
RadyoMaN Erin Lumosbog
