Davao City – Mipanaw na sa laing kalibutan ang usa ka police instructor nga nadisgrasya samtang gitambalan sa Southern Philippines Medical Center (SPMC) gahapon sa hapon.
Wala na maka-agwanta ang police instructor nga si Desirio Relasyon ug namatay gayod kini kinsa giatiman sa medical staff sa SPMC gahapon’g adlawa.
Nasayran nga nakahiagom og di’ tiaw nga bun-og sa kalawasan si Relasyon gumikan sa kakusog sa impact sa pagbangga sa 911 Ambulance sa SUV nga gisakyan sa biktima pasado ala 1:00 sa hapon kagahapon.
Paingon unta sa south-bound area ang SUV nga gimanehoan ni Relasyon dihang kalit kini gibanggaan sa ambulansya pag-abot sa flyover sa may Milan, Buhangin, ning siyudad.
Giingong mupaingon unta sa Davao Doctors Hospital ang ambulansya dihang nahitabo ang aksidente.
Paspas gisapupo si Relasyon paingon sa SPMC apan human sa lima ka minuto nga pagtambal gideklara sa doktor nga patay na ang biktima.
Lakip usab samdan ang upat ka mga police trainee kinsa pulos pasahero ni Relasyon apan anaa na sa luwas nga kahimtang.
Kasong reckless imprudence resulting to homicide ug physical injuries ang posible’ng atubangon nga kaso sa driver sa ambulansya kinsa wala nganli sa kapulisan sa Buhangin.
RadyoMaN Joel Viray
