Nagpakitabang ang Police Regional Office 12 sa RMN GENSAN aron mapa-abot sa katawhan nga dili mabalaka sa mga nagkatag nga mga mensahe sa social media.
Sumala kang Police Senior Superintendent Leonardo Suan, ang Deputy Regional Director sa Police Regional Office 12 nga adunay daghan nga mga katawhan ang naalarma human magkatag ang mga mensahe sa social media kabahin sa sumala pa adunay mga pagahimuon nga pagpangatake ang teroristang grupo sa Central Mindanao.
Pamahayag niini nga walay susamang mga intel report nga nakaabot kanila pasabot nga wala kini kamatauuran.
Dugang pagbutyag ni Col. Suan nga nagpabiling hapsay ug malinawon ang tibuok rehiyon 12 luyo pa man sa nasinatiang kagubot sa syudad sa Marawi.
Pag-angkon niini nga adunay gipatuman nga curfew sa probinsya sa Sultan Kudarat gumikan aduna matud pay taas nga porsyento sa bahad sa siguridad. Apan gawas sa maong probinsya, nagpabiling hapsay ug malinawon ang uban pang mga lugar sama nalang sa dakbayan sa GenSan.
Kung asa nagpabiling normal ang pagpahigayon ug mga checkpoint apan kini ang mas gipahugtan aron masigurong walay makalusot nga mga dautang elemento.
Padayon man usab ang panawagan niini sa katawhan nga makig-alayon kanila pinaagi sa paghatag ug impormasyon higayon nga adunay mga makadudahang tawo, butang o mga panghitabo sa palibot aron nga mahatagan ug aksyon sa otoridad.
Kahibaluan nga adunay mga nagkatag karon nga mga mensahe pinaagi sa social media partikular na ang facebook nga sumala pa gikan sa rebeldeng Bangsamoro Islamic Freedom Fighters kon BIFF nga adunay mahitabong pagpangatake sa mga syudad nga gilangkubang sa Tacurong nga sumala pa pangunahan sa mga teroristang sila si Abo Nasrif, Abo Toraypi, Ishak Alamada ug Wari Malik.
Ingon man ang syudad sa Kidapawan nga pangunahan matud pa sa teroristang si Tata Kato, Abo Saiden ug Abo Murad.
Apil ang dakbayan sa Gensan nga pangunahan Ansar Khilafa Philippines nga gidumalahan kaniadto ni Tukboy Maguid, ang syudad sa Davao nga atakihon matud pa sa mga wala mailhing miyembro sa grupo sa Maute ug ang syudad sa Koronadal nga pangunahan nilang Muhammad No, Abo Torab, Abo Yasin ug usa ka Benjie Lamp. (Lore Mae V. Romualdo)
