Political Analsyt: Ubos nga trust rating sa Marcos administration, resulta sa mga saad nga wala matuman

Davao City – Tungod sa mga saad nga walay katumanan, nawad-an na og salig ang katawhan ngadto sa administrasyon ni President Ferdinand Marcos Jr.

Kana ang nahimong baruganan ni Prof. Randy Ponteras, Political Analyst ug Kagawad sa Brgy. 76-A sa interview sa DXDC RMN Davao. Sumala niya nga miubos ang trust rating ni PBBM tungod nadismasya na ang mga Pilipino sa mga pasalig niini nga nagpabiling matud pang pasalig lang.

“Labi na kay President PBBM nga daghang pasalig, ilabi na sa presyo sa bugas nga maoy gibalik-balik sa mga memes karon. Hinaut nga matubag na niya kay nag-unang suliran mani sa katawhan ning pagkaon ug kagutom,” butyag ni Ponteras.

Base sa OCTA research survey, si PBBM nakatala og 69% trust ratings karon nga mas ubos og unom ka puntos kumpara sa 75% trust nga nakuha niini niadtong Disyembre 2023.

Samtang miubos kang Vice President Sara Duterte nga adunay 68% trust rating karon nga mas ubos gihapon kung itandi sa 77% niadtong milabay nga tuig.

RadyoMaN Ivy Parido