Political Analyst: 3 ka Duterte sa senado, impossible

Davao City – Gisungog lang ni Vice President Sara Duterte ang mga misuway og daot sa mga Duterte ug gisuwayan kung makakuha ba sila og suporta sa katawhan.

Kana ang pagtuo sa usa ka political analyst sa Davao City nga si Prof. Ramon Beleno III sa interview sa DXDC RMN Davao human gibutyag ni VP Sara gahapon June 25, 2024 nga mudagan isip senador ang iyang amahang si Former President Rodrigo Duterte, mga igsuong si Davao City Mayor Baste Duterte ug Congressman Paolo Duterte karong 2025 midterm elections.

Dugang pa nga mubalik sab siya isip alkalde sa Davao City ug si Mayor Baste mudagan isip presidente sa 2028 elections.

Butyag ni Prof. Beleno nga ‘testing the waters’ lamang kini aron matud pa makita kung aduna ba silay makuhang suporta ug aron usab kutawon ang utok sa ilang kalaban.

Apan sumala pa sa political analyst nga dili mamahimong 3 ka mga Duterte ang anaa sa senado tungod mabahin ang boto ug wala matud pa silay political party.

Sa katapusan, gibarugan ni Beleno nga ang pamahayag sa bise komedya lamang ug dili seryoso.

RadyoMaN Ivy Parido