Roxas City, Capiz- Ginapanghawiran sa gihapon ni Vice Governor Nonoy Esteban Contreras ang ginakabig “gentleman’s agreement” sa tunga nila ni Capiz Gov Tony del Rosario sang nakaligad nga 2016 election. Ini sa pihak nga si del Rosario amu na ang gin-endorso sang partido Liberal bilang pambato sa pagka-gobernador sa 2019 midterm election sa Capiz.
Sa interview sang dyVR kay Contreras, ginsiling sini nga nahisugtan nila sadto ni del Rosario nga kun mahimo magpaiway anay siya sa pagpadalagan sa pagka-gobernador kag sa baylo si del Rosario amo ang magapadalagan sa kondisyon nga isa lang ka termino.
Apang suno kay Contreras, gulpi na gid lamang ini ginkadto-an ni del Rosario sa iya talatapan kag ginsilingan nga ini sa gihapon amu ang padayon nga ginaduso sang mga lideres sang Liberal Party sa pagpadalagan bilang gobernador. Ginpabutyag ni Contreras nga ginabaton na gid lamang sini nga indi tanan sang mga promisa sa pulitika ang nagakatuman. Sa pihak sini, apisar nga wala matuman ang “gentleman’s agreement”, nagapabilin sa gihapon ang pagrespetar ni Contreras sa pamilya del Rosario.
