Davao City – Pabor ang Parish Pastoral Council For Responsible Voting (PPCRV) nga idili na ang voters preference surveys sama sa ginalusad sa mga pollsters pananglitan ang Social Weather Station (SWS) ug Pulse Asia karon nga nagkaduol na ang eleksyon sa Mayo 13, 2019.
Matud ni PPCRV Convenor Henrieta De Villa, ‘mind conditioning’ ang mga surveys diin daku kini’g epekto sa choices sa mga botante sa ilang pagpili pag-abot sa adlaw sa pagboto.
Dismayado si De Villa kay daghan pa gihapon sa mga botante ang wala nag-matured sa aspetong piniliay diin ang ilang pagboto nagdepende sa mga surveys ug wala sa kwalipikasyon kun katakos sa mga kandidato.
Sumlaa ni De Villa, ang pagboto sa usa ka kandidato dili dapat i-base lamang sa mga surveys inay didto i-angkla sa ilang pagkatawo ug sinseridad diha sa pagserbisyo ug pagpangalagad sa publiko.
Gi-awhag ni De Villa ang katawhan nga sutaon ang mga plataporma ug ang mga plano sa mga kandidato kung unsa ang ilang buot himoong prayoridad sa ilang pagserbisyo kay basin personal nga interes ra diay ang ilang tumong sa pagpapili.
Gipasidan-an ni De Villa ang mga botante nga sila ra usab ang tagsala kun unsay dangatan sa ilang mga lugar kung masipyat unya sila og pili upat ka bulan gikan karon.
RadyoMaN Joel Viray
