Davao City – Dili kumbinsido si University of Mindanao Professor Randy Ponteras kun hisgutan ang pagtubag sa mga lideres sa mga panginahanglan sa katawhan nga apektado sa lockdown.
Sumala ni Prof. Ponteras nga buhing testigo ang padayon nga pagbagulbol sa katawhan susama sa wala maapil sa 4Ps, dili makadawat og social amelioration program ingun man ang pagkalangan sa pagpang apod apod sa rasyon.
Matud pa sa professor nga nidayeg siya kun sa aspetong pagtubag sa kagamhanan aron mapugngan ang pagkuyanap sa COVID-19 tungod kay dali kining naka hukom nga i-quarantine ang tibook nasod.
“Naay maayong tubag ang atong gobyerno sa paglockdown sa pagcontrol sa kanang muingon ta nga mukuyanap ang sakit pero dinhi sa pagtubag sa panginahanglanon sa katawhan kay na lockdown lagi sila medyo layo pata, layo pa gyod” segun ni Ponteras.
Gidugang pa niini nga angay dayegon ang kooperasyon sa pribadong sektor diha sa panawagan sa kagamhanan aron mupartisipar sa pagtubag sa ubang panginahanglanon sa apektadong katawhan ingun man ang pag gamit sa FM pass diin ang ubang managsilingan mamalihug sa palitonon niadtong mugawas sa ilang mga panimalay.
RadyoMaN Erin Lumosbog
