Davao City – Dili lang dinhi sa Pilipinas adunay mga kaguliyang sama sa linog ug pagbuto sa bulkan apan bisan pa sa ubang mga nasud sama sa bangi sa America ug Iran, linog sa Turkey, bushfire sa Australia, novel coronavirus sa China, pagkatunaw sa Antartica, worsening climate change ug daghan pang ubang kalamidad.
Sumala ni kanhi Ateneo de Davao University (ADDU) Professor Randy Ponteras, wala sa mga panghibato karon ang mga timailhan sa pagtapos sa kalibutan apan kun ang bibliya ang pasultihon, ang senyales sa adlaw sa pagbalik ni Hesus sa kalibutan sa ikaduhang higayon masud-ong na.
Matud ni Ponteras, ang tanang dili kasarangan mga panghitabo karon dili pa mao ang mga senyales alang sa pagtapos kun hingpit nga katapusan sa kapin pito ka bilyon nga mga tawo sa entero kalibutan.
Ang mga katalagman, kalamidad ug trahedya nga miputos karon sa tumang pagsulay sa kalibutan produkto sa ‘lifestyle’ sa mga tawo nga nagpatandog kun nagpa-epekto sa kinaiyahan ug sa kalibutan nga gipasagdan sa mga tawo diha sa pag-amoma ug pag-amping sa mga gipanghimo ug gipiyal sa Diyos ngadto sa tawo.
Ang paglurang sa mga linog sa Mindanao, paghinay sa pagbuto sa bulkang Taal, paghunong sa bangi sa America ug Iran karon lig-ong nga basehan aron masulti nga wala pa moabot ang takna sa katapusang adlaw sa kalibutan, segun sa professor.
Apan kun walay himoon nga lakang ang mga lideres ug ang katawhan sa matag nasud aron sulbaron pananglitan ang hulga dala sa climate change, global warming, bikil sa matag nasud ug daghan pang uban, hayan mosangpot gayud kini sa katapusan sa kalibutan,dugang ni Ponteras.
Tambag usab ni Ponteras nga magtinarong ug mangandam ang tanan aron kun mahitabo man ugaling ang gikabalak-an sa kadaghanan, wala na kita’y angay pang bati-ong kalisang sanglit preparado na man kita sa kun unsay magapanghitabo.
RadyoMan Joel Viray
