Davao City – Daan nang gibutyag sa mga eksperto nga ang populasyon sa tibuok kalibutan inig patong sa 2050 musaka na kini sa 11B diin dinhi sa Pilipinas, 145M ang paglobo pag-abot sa 2045.
Sa siyudad sa Dabaw, dili moubos sa 2.5% ang madugang sa populasyon matag tuig ug kini tungod sa nagkataas nga early pregnancy sa hut-ong sa mga kabataan karon.
Maong si Mayor Inday Sara Duterte-Carpio aktibo sa pagbisita sa mga barangay aron ipasabot ug edukahon ang magti-ayon mahitungod sa family planning, segun ni Councilor Joselle Villafuerte.
Sumala ni Villafuerte, nakigpulong na sab ang iyang komitiba sa Department of Education aron masal-ot sa curriculum ang subject nga reproductive health aron matudlo sa mga tulonghaan sa dakbayan sa Dabaw.
Kung dili masanta ang paglobo sa populasyon, muabot gayud ang panahon nga mas musamot ang kagutom ug giyera sa tibuok kalibutan, pagkulang sa resources, puy-anan, pagsi-aw sa krimen ug daghan pang uban isip domino effect.
Nasayran nga sagad sa mga magti-ayon nga walay pugong-pugong sa pagpadaghan og anak mao kadtong probre, kulang ang edukasyon, namuyo sa depressed areas ug daghan pang uban.
Mao kini ang pinaka rason nganong apil sa diskusyon sa pagdungog sa Konseho sa tinuig nga pundo sa siyudad ang pagtagana ug igong pondo sarang ma-utilisar diha sa pagpalit og contraceptives nga ipanghatag ngadto sa mga magti-ayon.
Sa nasangpit nga pamaagi, positibo si Villafuerte nga dili kaayo daling maapektaran sa pagsaka sa populasyon sa kalibutan ang Pilipinas ingon man ang dakbayan sa Dabaw padulong ngadto sa tuig 2050.
RadyoMaN Joel Viray
