Por causa na buracherias del chufer, ya ara el un Toyota hilux con un jeep de pasahero, dos motorsiclo y ya causa destroso na un establishimento de negocio y street light despues que ya perde ya control na su manejada el chufer nombrao como si Tilan Chen y Ye, 37 anyos de edad, residente del Poblacion SIndangan Zamboanga del Norte, na Gov Lim Avenue en este ciudad, alas 9:30 del ncohe.
Asegun con el chufer del jeep de pasahero nombrao como si Richard Pataroque, residente de brgy Divisoria, que ya pone le na urilla con su vehiculo por causa tiene pasahero quien ta munta, y despues ya oi le el fuerte sonor del rueda del vehiculo, pensando cae bien corre lang este, ya dale le camino para manda man una, pero espanta ya lang le por causa ya man bangga ya este conel su vehiculo.
Por causa asegun na fuerza, ya man bangga el PUJ na street light y ya entra el ngusu del vehiculo na un establishimento de negocio que aquel tiempo serao ya.
Por suerte nohay quien ya sale irido na maga pasahero y na chufer del PUJ, nohay tambien grande destroso na dos motorsiclo. Pero el chufer del Toyota Hilux, ya lleva na Zamboanga City Medical Center despues que ya tiene este irida.
El imbestigador del caso si PO1 Clemente ya habla que alegaomente bien buracho el chufer si Chen, y asegun ya precura este escapa amediante que ya man bangga ya le, pero por causa rebentao el su rueda nohay le puede sale.
Ya falla saca maga detalles el imbestigador desde con el chufer si Chen por causa chino este ta man cuento y lomismo el de este cellphone chino el maga palabra. Solamente el identificacion lang de este el ya puede saca por medio del su liscencia del manejada.
