Maga rescuer del bumbero ya salva el vida del un 21 año persona despues este ya subi na tower del NGCP na Guisao ayer aga.
Peleya entre man nobya el rason si porque si Jomarie Eugenio, ya subi na punta del tower y ya dale Mira acto de saltar.
Asegun Kagawad Noriel Kayanco, alas 7 del aga ya pasa pa si Eugenio na un tienda para compra sigarilyo pero despues lang del cuantos minuto ya columbra ya lang sila con Eugenio na punta ya del torre.
Dayun el maga ofiales del barrio, pamilya Di Eugenio ya entabla na lugar para subaha conele para abaha ya lang.
Pero ya man duru-pulso si Eugenio nohay quierre abaha.
Asegun consu pamilya yan pelyahan si Eugenio y su nobya si Jessica del Domingo por la noche.
Y tiene tamen deve le con un negocianta de butung na Bagsakan Center.
Ta pidi si Eugenio que mira le con Jessica.
Dayun ya actua el RMN Zamboanga y dayun canda Radyoman Merasol Monteza y si DJ Jude Villanueva ya busca con Jessica y ya encontra ta trabaha le un bakery na Talon-Talon.
Na supervision del Station Manager si Joel Sanson,ya lleva canda Monteza y Villanueva con Jessica na Guisao.
Amediante ta convinci si Jessica con Eugenio para abaha, dayun tambien yan taclas el dos rescuer del BFP SRU na torre y ya xonsigui estos salva con Eugenio y ya hace abaha.
