POSIBLE MGA ILONGGA | Lima ka Pinay ang stranded sa Turkey matapos nabiktima sang human trafficking kon sa diin ang airport of origin amo ang Iloilo

Report ni: Jennifer Palomo Debaja

Lima ka OFWs nga ginrecruit sa Hong Kong ang stranded subong sa Turkey matapos nangin biktima sang human trafficking kon sa diin ginpahanugutan ang mga ini nga makasakay sa International flight sa Iloilo International Airport nga wala sang mga papeles pareho sang OEC kag working contracts.

Ini nga impormasyon ang ginreveal ni outgoing HK Labor Attache Jalilo Dela Torre sa iya FB post sang Hulyo 19 kon sa diin iya ginpahayag nga ang Iloilo International Airport ang nangin “transshipment point for illegally recruited workers for Turkey”. Posible mga Ilongga ang mga biktima.


Dugang pa ni Dela Torre nga duwa pa ka Pinay ang iga deploy sa Turkey sa pareho nga paagi sang isa ka Hong Kong-based nga recruitment company nga H & L kag gina panag iyahan sang isa ka certain “Natalie.” Apang sang gin check ang H & L Recruitment Agency wala ini sang lisensya sa Employment Agency Administration sa Hong Kong.

Bangud sa natabo, ginhingyu ni Labatt Dela Torre sa Philippines Inter-Agency Council Against Trafficking kag sa Department of Justice nga imbistigahan kon paano nakalusot ang lima ka Pinay sa Immigration sa Iloilo International Airport nga wala sang legal nga papeles pa Turkey.

“The IACT and DOJ should investigate this, and put those responsible behind bars. Shame on those officials, they are as guilty as the human traffickers,” pahayag ni Labatt Dela Torre, kilala nga crusader batuk sa human trafficking.

Gindugang pa ni Labbatt Dela Torre, nga ginkumpirmar sang iya reliable contact sa Russia nga ginagamit ang Iloilo Airport bilang transshipment point sang human trafficking.

“My contact in Russia (has) informed me that two more recruits are to be sent to Turkey through Iloilo and Singapore”.

Nahibaluan nga ginpalab-ot sang reliable sources sa The SUN nga naghalin sa Iloilo International Airport ang lima ka Pinay sang Mayo 31 pa Singapore kag halin sa Singapore nagsakay ang mga ini pa Doha, Qatar.

Halin sa Doha nag travel ang mga ini pa Istanbul kag halin didto nag lupad na sa nagkalain-lain nga syudad sang Turkey.

Isa sa mga ini ang ginhatagan sang employer sa Ankara apang ginpaobra lang siya sang tatlo ka semana kag gulpi lang ginterminate. Ginrescue ang Pinay sang isa ka good Samaritan sa lugar matapos nakit-an ini nga nagatulog sa park.

Ang masakit, wala ginhatag sang employer ang iya passport kag cellphone tungod may utang pa ini nga 2000 US dollars sa agency nga pagabayaran niya kontani sang apat ka bulan.

Samtang magadangop naman sa Philippine Embassy sa Ankara ang apat pa ka mga Pinay agud makapangayo sang bulig nga makapauli matapos napaslawan ang mga ini nga makakita sang employer. Suno sa mga Pinay wala na sila sang kwarta kag nagakahangawa sang ila sitwasyon.

Facebook Comments