Davao City – Natapos na ang pagpili sa mga bag-ong opisyal sa Barangay ug Sangguniang Kabataan kagahapong adlawa ug bugtong lauman sa katawhan gikan kanila ang mao ang ilang pagtuman sa mga gisaad panahon sa kampanya.
Sumala ni Department of Education (DEPED-XI) spokesperson Jenielito ‘Dodong’ Atillo, bugtong himoon sa mga bag-ong midaug mao ang pagtuman sa ilang mga gipasalig alang sa ilang barangay human na gihatag sa mga tawo ang ilang gipangayo.
Gipasabot pa ni Atillo, bisan og wala pa hingpit natapos ang piniliay nga makonsiderang ni-improbar ang voters turnout kung itandi sa nakalabay’ng piniliay apan mamahimo kining pagtulon-an alang sa mga umaabot pang pagboto.
Samtang giklaro usab sa tigpamaba sa DEPED-XI, naglaum karon ang katawhan sa mga bag-ong napiling opisyal sa barangay nga maangkon ang kalinaw, kahapsay ug kalamboan sa komunidad.
RadyoMaN Bernard Pantallon
