Davao City – Dili una muhatag og reaksyon ang 10th Infantry Division Philippine hangtud dili pa makapagula og resulta sa imbestigasyon ang Special Investigation Task Group labot sa misencounter nga gikamatay sa unom ka sakop sa 1st Platoon 805th Mobile Company sa Regional Mobile Force Battalion 8 nga nahitabo sa Sitio Lunoy, Brgy. San Roque, Sta. Rita, Samar, Lunes sa buntag.
Matud ni 10th ID Spokesperson Capt. Jerry Lamosao, paaboton una nila ang resulta sa imbestigasyon ayha sila maghatag og assessment kun aduna bay lapses sa koordinasyon o wala tali sa Mobile Force Company ug sa 87th Infantry Battalion rason sa 20 ka minutos nga binakbakay.
Suma ni Lamosao, ang matag operating unit muagi gayod og koordinasyon aron dili mag-unay ugali mag-abot man sa counter site sama sa ginabuhat sa 10th ID busa walay misencounter natala sulod sa ilang Area of Responsibility (AOR).
Gipasabot ni Lamosao nga kabahin sa koordinasyon ang pagbinayloay og numero sa selpon, pagbaton og code nga magsilbing timailhan nga dili sila kontra ugali mag-abot man sa counter site.
Gani, regular ginahisgutan sa kumperensiya sa PRO 11 ug 10TH ID ang proper protocol sa koordinasyon sa pagsiguro ang matag operating unit sa militar masayod nga adunay mga operating unit sa kapulisan nagpatrolya sa lugar kung asa posibleng naglungga ang mga armadong grupo sama sa NPA.
RadyoMaN Joel Viray
