Davao City-Wala paman makasulod sa Mindanao ang Avian Influenza Virus apan gitratar na kini sa Southern Mindanao Agri Resources Trading Inc. (SMART Inc.) nga seryoso kini nga hulga ngadto sa ilang mga negosyo sa manok.
Busa wala magkumpiyansa ang mga poultry owners ug ilang gipahugtan ang ilang Bio-Security sa mga pultrehan aron dili maigo ug matakbuyan sa bird flu ang ilang mga manok.
Sumala ni Southern Mindanao Agri Resources Trading Inc. President Eduardo So nga puwede mahugno ang ilang industriya kung dili masanta ang pagkanat sa virus sa Visayas ug Mindanao.
Nagpasalamat si So ang Department of Agriculture kay ila gilayon na-contained ug nasanta ang pagkuya- nap sa bird flu apan wala nagpasabot nga magkumpiyansa na sila busa mas gidoble na nila ang pag-igmat kontra sa virus.
Sa karon, gisulti sa pangulo sa Agri Association nga nagpatawag na sila og panagpulong sa ilang mga sakop ug na-uyunan ang pagpasaka sa bio-security sa ilang mga pultrehan isip pang-alkontra sa bird flu.
Gilauman na daan sa Agri Association nga musaka ang demand sa suplay sa manok ug itlog sa Luzon area nunot sa pagsunog sa 400 mil ka manok nga nataptan og virus sa Pampanga.
Gumikan niini, nangayo og ayuda si Department og Agriculture Secretary Manny Pinol sa mga pultrihan owners sa rehiyon aron magsuplay og manok ug mga itlog sa kauluhan.
Hinoon, gipasalig ni So nga adunay igong suplay ug adunay kapasidad ang poultry industry sa rehiyon onse sa pagsuplay og manok ug itlog sa Luzon area.
Nagpatawag og emergency meeting ang National Meat Inspection Commission Davao Region ngadto sa mga dagkong planta sa manok aron ipaabot ngadto kanila ang kamandoan ug diriktiba ni DA Secretary Manny Pinol kagahapon adlawa.
Gibutyag ni Magnolia Philippines Davao Del Sur Manager Shine Mendoza nga usa sa ilang nahisgutan sa panagpulong mao nga buot ni Secretary Pinol nga mutabang sila sa pagsulbad sa suliran sa bird flu aron dili muabot diri sa Mindanao.
Kasamang Joel Viray
