Davao City – Gilauman nga human sa lima ka tuig nga pagpatuman sa mga bag-ong programa karon sa gobyerno, mubaba ang porsyento sa kapobrehon dinhi sa Pilipinas.
Sumala ni Sec. Noel Felongco, lead convenor sa National Anti-Poverty Commission (NAPC), nga base usab sa mando ni Pangulong Rodrigo Duterte, puntirya nila nga mubaba gikan 21.65% ngadto sa 14% ang poverty rate sa Pilipinas diin sa aktwal nga ihap anaa kini sa unom hangtod sa walo ka milyon ka mga Pilipino ang buot mahaw-as sa kapobrehon.
Dinhi sa Mindanao, anaa sa 40% sa 27-M population kun kapin 10-M ang nakasinati og kapobrehon.
Gani hinay-hinay nang gisugdan ang duha ka mga programa sa NAPC nga mao ang Sambayanihan, Serbisyong Sambayanan (SSS) nga mutabang sa mga urban poor sector og access sa mga basic services, livelihood ug employment ug ang Actionable Development Agenda for Poverty Transformation (ADAPT) 40/10/10 diin mutabang sa mga pobreng komunidad sa nasud nga muangay sa mga epekto sa climate change.
Segun ni Felongco nga tunga-tunga karong tuiga solido na ang maong mga programa sanglit nagpadayon ang ilang pagtuki sa paghan-ay niining poverty alleviation program.
RadyoMaN Jason Amisola
