Pre-Demolition Conference, gipahigayon sa PCUP sa Brgy. Tablon!

Ang mga informal settlers nga mitambong sa Pre-Demolition Conference sa Brgy. Tablon Covered Court / Photo by: RadyoMaN Andy Coco

Gipahigayon sa Presidential Commission on Urban Poor kon PCUP ang Pre-Demolition Conference karong hapon.  Kini dunay kalabotan sa Writ of Demolition nga gi-isyu sa korte kontra sa mga informal settlers diha sa Purok 11, Brgy. Tablon ning syudad sa Cagayan de Oro.

Gitambungan ang maong komperensya sa mga representante gikan sa City Housing for Urban Development kon CHUD, City Administration, Commission on Human Rights kon CHR, DILG-PNP, DEPED, Council sa Brgy. Tablon ug lakip nga mitambong ang mga residenti ug leaders sa maong lugar.

Nasayran nga moabot sa 261 households ang gi-ingong iligal nga namuyo karon diha sa Purok 11, Tablon ning syudad.  Gikabutyag nga nagbayad sila sa kantidad nga 500 pesos per month sa ilang asosasyon kung diin gibana-bana karon sa kapin 130,000 pesos ang makolektang kwarta matag bulan.


Hangyo karon sa pamilyang Neri-Guirnela-McNeill, ang tag-iya sa luna pinaagi ni Ms. April Rose Dablio nga boluntaryo na lamang nga moguba sa ilang panimalay ang mga residenti aron nga hapsay ug malikayan ang gubot.

Dugang pa ni-ini nga andam silang mohatag sa financial assistance ngadto sa mga boluntaryong mo-demolish sa ilang structures ug mohatag sab sa tabang legal aron nga makasuhan ang mga tawong nangilad ngadto kanila.

Kahinumduman nga niadtong bulan sa Enero ning tuiga, nasikop na sa mga otoridad si Emmanuel Saraos, ang usa sa mga gi-ingong nagpasiugda nga puy-an ang maong luna tungod sa kasong Indirect Contempt.

Sa pagkakaron gisabutan na sa Sheriff ug mga informal settlers kung kanus-a sila boluntaryong mopahawa sa maong lugar.  Ang magmagahi nga mohawa, mapugos matud pa ang goberno nga ipatuman ang demolisyon.

Kasama mo sa Balita, RadyoMaN Andy Coco, DXCC Tatak RMN!

Facebook Comments