Preemptive evac dakung hagit

20

Davao City – Gimahay sa Davao City Disaster Risk Reduction Management Council (DCDRRMC) ang mga tawo nga tungod sa kagahi sa ilang mga ulo, hapit na hinoon nameligro ang ilang mga kinabuhi gumikan kay nakulgot sila sa ilang mga panimalay nga hapit nang malamoy sa tubig-baha nga miawas gikan sa Talomo River.

Aminado usab si Barangay Talomo Proper Barangay Chairman Bendor Calamba nga bisan sila wala tuho-i gani nagdumili ang mga residente sa pagkuyog sa mga responders dihang gimando ang preemptive evacuation sa katarongan nga wala pa mudako ang baha nga mihampak sa ilang barangay niadtong tungora.


Kumento ni Kinaiyahan Foundation Focal Person Betty Cabasares nga daghan gihapon sa mga Davaoeños kulang sa pagsabot ug kahibalo sa ‘preemptive evacuation’ ug unsa kini ka dakung tabang sa mga masugamak sa katalagman ug kalamidad sama sa pagbaha.

Gisulti ni Cabasares nga mas maayong adunay mahimugso nga ordinansa sa dakbayan nga mag-obliga ug magpugos sa mga tawo sa paghikling gikan sa ilang mga balay maingon man sa pagsanong sa ‘preemptive evacuation’ nga ipatuman sa mga awtoridad.

Ang pagbaha sa nakalabay’ng gabii nga nilampornas sa pito ka barangay ug ang labing apektado mao ang Barangay Talomo naghulagway lamang sa pagka-upaw sa kabukiran karon nunot sa pagpamutol og kahoy sa mga magpapatigayon.

Kung dili gayod muhunong ang mga tawo sa pagpasipala sa kinaiyahan ug walay himoong programa nga magpapuno og mga kahoy sa kabukiran, muabot gayud ang panahon nga maglutaw na sa baha ang syudad sa Davao, dugang sa environmental advocate.



RadyoMaN Joel Viray


Facebook Comments