Davao City – Walay makapugong sa mga kalamidad nga mahitabo tungod kay pagbuot kini sa kinaiyahan busa angayan kining pangandaman sa mga tawo aron makalingkawas sa dakong distroso ug pagkakalas sa kinabuhi.
Sumala ni Lasang Barangay Captain Allan Simoag, bugtong panagang lamang niini mao gayud ang kanunay nga pagpangandam gani sa ilang barangay sa dili pa moabot ang pagbaha ila na kining ginamonitor ug gilayong magpatuman sa mga preemptive measures.
Samtang giklaro usab sa kapitan sa barangay Lasang nga wala magkulang ang gobyerno sa hisgotanang pagpangandam ug kagamitan alang sa hinanaling pagresponde kung ugaling adunay kalamidad nga mahitabo, ang problema lamang mao ang kahinay sa kooperasyon sa mga tawo kung aduna nay himoong action ang gobyerno.
Tungod niini gisugyot ni Simoag nga butangan og ngipon ang ‘preemptive evacuation mode’ aron pahamtangan og silot ang dili motuman niini sa higayong dunay umaabot nga kalamidad sa usa ka lugar.
RadyoMaN Bernard Pantallon
