Ginpangunahan ni Presidente Rodrigo Duterte ang decommissioning sang 727 ka mga anay miyembro sang Revolutionary Proletarian Army- Alex Bongcayao Brigade ukon RPA-ABB nga karon mga katapo na sang KAPATIRAN sa Camp Macario Peralty sa Jamindan, Capiz.
Sa nasambit nga kahiwatan, ginpresentar man sang Presidente ang 315 ka mga long fire arms nga ginsungka sang mga rebelde sa kapulisan kag militar.
Ang Decomissioning ang kabahin sang peace agreement sa tunga sang gobyerno kag mga anay rebelde sadtong tuig 2000.
267 sa mga miyembro sang KAPATIRAN ang magapaidalum sa 45 ka adlaw nga paghanas agud mangin katapo sang Community Defense Unit nga isa man ka component sa security operations.
Sa iya pagpamulong-pulong, gin-engganyo sang Presidente ang mga nagsungka nga mga rebelde nga hingalitan ang kahigayunan nga magpangabuhi sang malinong kag matawhay upod sa ila tagsa ka pamilya.
Iya man ginpasalig sa mga ini ang bug-os nga suporta sang gobyerno sa ila pagbalik sa sosyedad.
Ginganyat man ni Duterte ang magtimbang nga bahin nga padayunon ang pagbuligay agud masiguro nga indi mausik ang nangin bunga sang madugay na nga peace negotiation.
