TANAUAN LEYTE – Arestado an number 1 most wanted person ha municipalidad han Tanauan, Leyte ha ginbuhat nga man-hunt operation han Tanauan Municipal Police Station ngan PCP-5 Caloocan City ha Sitio Dagatdagatan Brg. 178 Caloocan City.
Ginkilala an akusado nga hi Manuel Agrava Aralar Jr. nga residente han Burauen, Leyte.
Sumala kan PCInsp. Francisco Tupaz Jr, Chief Of Police han Tanauan Municipal Police Station, hi Aralar in anay na nga nakapreso ha Leyte Provincial Jail dida han 2011 ha kaso nga 3 counts of rape, ngan nakagawas ha presohan dida han 2013 matapos an bagyo Yolanda. Matapos daw makagawas ha presohan an suspek in waray na ini bumalik.
Ha pagka-yana in namumutang na ha kustudiya han Tanauan MPS an akusado ngan aatubangon an kaso nga gin-pasaka ha iya.
Samtang, tinikangan dida han Enero 2018, 3 na nga wanted person an nadakop han Tanauan PNP.
