Presyo sa petrolyo posibleng maapektuhan sa kagubot sa Israel

Nabalaka ang mga netizen nga posibleng maapektuhan ang ekonomiya sa Pilipinas tungod sa nahitabong kagubot sa Israel human nga giatake ang nasud sa mga militanteng grupong Hamas, diin gatusan na ang natala nga namatay.

Kumento ni Arvin Taupan sa DXDC 621 RMN Davao Facebook page, nga sama sa nahitabong giyera kaniadto sa ubang nasud, mamahimong rason usab sa pagtaas sa presyo sa produktong petrolyo ang kagubot sa Israel, diin maapektuhan na usab ang mga motorista.

“Naa na poy rason motaas ang presyo sa petrolyo,” kumento ni Taupan

Matud sa pipila ka analyst nga bisan dili major oil players ang Israel ug Palestine, posible gihapong makaapekto sa presyo sa produktong petrolyo ang maong sitwasyon.

Hinuon, ‘good news’ alang sa mga motorista ang dakong rollback nga ipatuman sa petrolyo ugmang adlawa, Martes, October 10, 2023.

Sa anunsyo sa mga oil company, anaa sa P2.90-P3.20 ang iubos sa matag litro sa gasoline, sa diesel anaa sa P2.30-P2.60 ang iubos matag litro, samtang sa kerosene anaa usab sa P2.80-P3.00 ang iubos matag litro.

RadyoMaN Kirby Manzon