Davao City – Gibati na sa yanong lungsuranon ang direktang epekto sa pagsaka sa presyo sa basic ug prime commodities tungod sa walay puas nga usbaw sa presyo sa produktong petrolyo sa nasud sa Pilipinas.
Subling nagpasaka ang mga oil companies sa presyo sa petrolyo diin 50 hangtud 60 sentimos ang dugang usbaw sa preyo sa gasolina, diesel, ug kerosene.
Gawas ani, misaka usab og nobenta sentimos ang matag kilogram sa Liquefied Petroleum Gas kun kapin noybe pesos alang sa 11 kilogram nga tangke.
Tungod ani, nangayo karon og usbaw sa suhulan ang Trade Union of Congress of the Philippines (TUCP) sa dise siyete ka wage boards aron patas-an ang sweldo sa mga trabahante sa tibuok Pilipinas.
Giingon ni TUCP Spokesperson Alan Tanjusay nangayo usab sila og sabsidiya sa gobyerno aron i-ayuda ngadto sa mga wage earners sarang makasugakod sila sa kamahal sa mga palaliton karon.
Segun ni Tanjusay, ginatuki usab sa ilang grupo ang posibleng pagrekomendar sa gobyerno nga ibalik ang regulation ang industriya sa petrolyo sa nasud maingon usab ang sabsidiya sa gasolina.
Gani kamatooran ani, dugay nang daw na- hostage sa mga oil companies ang katawhan tungod kay mismo ang gobyerno walay mabuhat aron pugngan ang pagsaka sa presyo sa petrolyo.
RadyoMaN Joel Viray
