Roxas City, Capiz- Gina-implementar na sa subong sa Teodoro Arcenas Trade Center(TATC) ang suggested retail price(SRP) sa bugas.
Ginkumpirmar sang presidente sang mga retailers sang bugas sa TATC nga si Mr. Edilberto Cambi nga sang nakaligad nga Nobyembre 9, 2018 ini ang ginpatuman sa bilog nga pungsod Pilipinas base man sa ginpapanaog nga direktiba ni Agriculture Secretary Manny Peñol.
Sa interview sang dyVR RMN Roxas kay Cambi, ginsiling sini nga ang premium grade rice nga amu ang gina-import nga bugas sa luwas sang pungsod ang indi dapat maglapaw ang presyo sa tig-47 pesos ang kada kilo.
Ang will-milled rice ang indi dapat maglapaw sa tig-44 pesos ang kada kilo samtang ang regular-milled rice ang indi dapat maglapaw sa tig-39 pesos ang per kilo.
Samtang ang mga classified ukon special rice kaangay sang pilit, brown rice ukon ang mga traditional varities sang bugas ang wala naman masakop sa ginapatuman nga suggested retail price.
Kasunod sang nasambitan nga pagsulondan sang NFA, ginsiling ni Cambi nga ang sin-o man nga madakpan nga magbayolar ang mahimo nga mamultahan. Sa 1st offense ang mga ini ang magapanabat kun sa diin mahimo nga mapreso sang apat ka bulan tubtob duha ka tuig depende sa kabug-aton sang bayolasyon kag penalidad nga P2, 000 pesos tubtob P1, 000, 000 pesos.
Posible mabawian ang mga ini sa lisensya kag indi na makabaligya pa sang bugas.
