iFM Laoag – Plano ti Sirib Youth Academy & Advocacy Center (SYAAC) nga adda iti sidong ti Sirib Ilokano Kabataan Association (SIKA) Inc. nga isayangkat iti kaunaan a gundaway ditoy Ilocos Norte ti “Pride March” para kadagiti kakabsat a miembro ti LGBTQ+.
Daytroy ti impakaammo ni Mr. Rogie Balino, mangidadaulo ti SYAAC a paset daytoy iti pannakidanggay ti LGBT ditoy Ilocos Norte iti pannakarambak ti “Pride Month” ita a bulan ti Hunyo iti intero a lubong.
Kinunana a mannarimaan pay laeng ti panangiproseso ti grupoda para iti pannakaisayangkat ti nasao nga aktibidad iti gobierno probinsial.
Segun kenkuana, malaksid iti “pride march” ket plano pay dagitoy ti mangiyestablisar ti “Pride Wall” iti Sirib Mile – daytoy ket maibilang a freedom wall.
Kunana a no maaprobaran ti panangipasdekda ti pride wall ket agbalin ti Ilocos Norte a kaunaan a lugar a maaddaan ti nasao a proyekto iti entero a Pilipinas wenu iti Asia.
Intono Hunio 23 ti punteryada nga aldaw a panangisayangkatda iti nasao nga aktibidad. Daytoy ngamin ti immuna a petsa a pannakaisayangkat ti LGBT Pride March iti intero a lubong.
Bernard Ver, RMN News
