BACOLOD CITY – Ginpulihan kastigo sang duha ka detainee ang isa man ka priso sa sulod sang detention facility sang Police Station 5 kaina sang kaagahon sa Brgy. Granada, Bacolod City.
Nakilala ang biktima nga si Eliseo Lacson III, 21 anyos ang edad kag pumuluyo sang Charito Heights, Brgy. Granada, Bacolod City.
Samtang nakilala naman ang mga suspek nga magtiyo nga amo sanday Janrey Gallente, 30 anyos kag hinablos sini nga si Johnny Gallente Jr., 19 anyos, lunsay pumuluyo sang Brgy. Granada.
Suno sa imbestigasyon, ang magtiyo nga Gallente ang bag-o lang ginsulod sa detention facility sang Police Station 5 pasado las tres kaina sang kaagahon.
Apang sang manug-tulog na, nag inagaway sila sang pwesto sa tululugan gani naglalisay ang magtiyo kag si Eliseo.
Bangud sang mainit nga diskusyon, ginpulihan kastigo nanday Janrey kag Johnny ang biktima.
Nag-angkon sang pilas sa iya ulo kag wala nga agtang nga biktima kag gindala ini sa Corazon Locsin Montelibano Memorial Regional Hospital./dyHB BACOLOD
