Patay ang isang prison guard matapos na barilin ng isang inmate sa loob ng Laguna Provincial Jail sa Sta. Cruz, Laguna kaninang alas-9 ng umaga.
Sa ulat na nakarating sa Camp Crame, kinilala ang biktima na si Jonathan Sombilla Buenviaje, 50 taong gulang, Prison Guard I, residente ng Barangay Maulawin, Pagsanjan, Laguna.
Base sa inisyal na imbestigasyon, nagbabantay sa Dorm 1 ng Provincial Jail ang biktima nang biglang agawan ng baril ng suspek na si Romnick Balbaran Estadilla at pinagbabaril.
Agad naman rumesponde ang isa pang jail guard at binaril ang suspek na nagresulta sa pagkasugat nito.
Kapwa isinugod sa ospital ang suspek at ang biktima, kung saan idineklarang dead on arrival ang biktima.
Inaalam pa sa ngayon ng mga imbestigador ang motibo sa naturang insidente.
