Privilege speech gihimong personal ni Abellera

Davao City – Giingon ni Davao City 3rd District Councilor Conrado ‘Conde’ Baluran, daw gihimong personal ni Davao City 1st District Councilor Nilo ‘Small’ Abellera, ang iyang oras sa privilege speech atol sa regular session sa konseho niadtong adlaw’ng Martes.

Gipasabot ni Baluran, dili usab nila mabadlong si Abellera kay ginatugot sa privilage speech sa bisan unsang topiko nga dad-on sa plenaryo ug kung nagpadayag man og kadismaya si Abellera tungod wala kini pasudla sa special session ug sa unang State of the City Address (SOCA) ni Davao City Mayor Sebastian ‘Baste’ Duterte, mao usab kadto ang iyang pribileheyo nga gihatag sa konseho kaniya.

Apan alang kang Baluran, wala nalang unta dad-a sa plenaryo, ang gibati ni Abellera, kansang maayo untang gihimo niini mao ang pakigpulong sa liderato sa konseho pinaagi kang Davao City Vice Mayor Melchor Quitain Jr.

Hinoon, dili segurado si Baluran kung duna ba’y himoong lakang ang liderato sa konseho batok kang Abellera, sanglit nagsabwag og bangi sulod sa konseho, ang pagdangat sa personal nga gibati niini sa mga anaa sa likod sa pagbabag kang Konsehal Abellera nga makasaksi sa SOCA sa Mayor.

RadyoMaN Joel Viray