i Balita
May 09, 2020
(Photo from web)
PRO 6 GINKONDENAR ANG AKTO SANG PULIS NGA NADAKPAN NGA NAGAKARGA SANG MAKAHULUBOG NGA ILIMNON SA BANWA SANG STA. BARBARA, ILOILO
Ginakondenar sang Police Regional Office 6 ang nangin akto sang isa ka Philippine National Police personnel nga assign sa Camp Martin Delgado matapos nga nadakpan nga naga-transport sang 30 ka karton sang makahulubog nga ilimnon apisar sang ginapatuman nga Liquor ban bangud sang Enhanced Community Quarantine.
Suno kay PRO 6 Acting Spokeperson Pol. Col. Gilbert Gorero wala ginatolerar ni Director Rene Pamuspusan ang nangin akto ni Police Staff Sgt. Paul Pinggoy ilabi na nga isa sang mga programa sang Heneral sa Rehiyon 6 amo ang internal cleansing sa ila hanay.
Pahayag pa ni Gorero, nga klaro ang nangin instruction ni Director Pamuspusan sa tanan nga pulis nga suportahan niya ang tanan nga nagahimo sang intsakto apang kon makasala, wala na ini sang rason nga magtinir pa sa PRO 6.
Nagmandu man ang heneral nga filan sang kaso criminal kag administratibo.
Nagpaandam naman ang PRO 6 sa tanan nga uniform kag non- uniform personnel nga plano pa magahimo sang kasubong nga akto.
Nagpanawagan man ini sa publiko nga mag-sugid sang ila nahibaluan kon may mga katapo sang pulis nga nagahimo sang katuntohan.
