Ginkalipay sang Police Regional Office 6 ang pag-upod sa ikaduha nga tion sang mga local candidate sa May 2019 nga eleksyon sa ginpatigayun nila nga Unity Walk kag Peace Covenant signing nga ginhingadlan USAP para sa PILI-PINAS kaina sang aga.
Suno kay Police Supt. Joem Malong ginlakip nila ang mga representante sang mga simbahan upod ang mga kandidato sa tinutuyo nga ma-refresh ang mga politiko sa nauna nga ginpirmahan nila sa covenant signing para sa matinlo kag matawhay nga eleksyon.
Dugang pa ni Malong nga ginalauman nila nga respetuhon sang mga kandidato ang kinamatarung sang mga botante sa pagpili sang ila nahamut-an nga kandidato.
Ang aktibidad ang gin-updan sang mga local candidates halin sa syudad kag probinsiya sang Iloilo.
Kadungan man sini, ginpatigayun man sa iban nga probinsiya sa Rehiyun 6 ang kasubong nga aktibidad.
Nahibaluan nga sa Marso 29 magasugod na ang campaign period sang mga local candidate nga ginapaabot sang PNP nga mangin mainit kon ikumparar sa senatorial campaign period nga nauna na nga nag-umpisa.
