Nagpahayag sang suporta ang United Muslim Federation of Western Visayas ukon UMFWV sa kampanya sang kapulisan kontra sa terorismo.
Kasunod ini sa pagsinapol nga ginhiwat sa Kampoi Delgado nga gintambungan sang 37 ka Muslim leaders sa rehiyon 6.
Ginpahayag ni PRO-6 Spokesperson Supt., Joem Malong nga sa nasambit nga sinapol, mabaskog nga ginkondenar sang UMFWV ang sunod-sunod nga pagpangbomba sa Mindanao.
Suno kay Malong nga ginpat-od sang Muslim leaders nga magakooperar ang mga ini sa pag-away sa terorismo.
Ginpasalamatan man sang PRO-6 ang Muslim Community sa kooperasyon nga ginatanyag sa mga pulis sa Western Visayas.
Kadungan sini, liwat gin-athag ni Malong nga wala sang kamatuoran kag Fake news ang nagalapta nga impormasyon sa Social media kag sa text nga yari na sa Iloilo ang mga miyembro sang ISIS agud magsabwag sang terorismo.
